Вырава є невелике русиньске село, котре у своїй історії  зазнало і свої звучны часы, але і свою стаґнацію. На початку 20. столітя село мало вецей як 400 жытелів. Было то централне село, з урядом  нотаря, жандарьсков станіцьов, а пак і поштов і основнов школов. Лісы Выравы властнили подникателі  з Прагы – Карел Шкода і Карел Шедїви. Днесь сітуація у Выраві а інакша. В  селі жыє лем 190 жытелів і тым способом є ту і адекватна сума фінанцій в  сельскім бютжеті. Праві фінанції были причінов, же перед выше 10-роками была ту зрушена основна школа. Нас інтересувало, яка є сітуація днесь около будинку бувшой школы. Говорить старостка села Вырава Моніка Куртякова, „уж єм пару разів повіла, же найтяжшов сітуаціов, котру єм зажыла при старостовані было якраз зрушіня нашой валалской школы. Наша школа нам вісім років стояла без жывота, потім ся нам подарило в ній на два рокы зрядити денный стаціонар про найстаршых жытелів села а в тім часі мать просторы пронаяты єдна компанія, котра реалізує в нашім селі выбудованя такзв. переберачой станіці у Великій Выраві в рамках пліноводу в нашім реґіоні. Чекам уж лем на підписаня договору, в котрім ся пише, же нам была одобрена дотація у вышкі 150.000 евр на єй реконштрукцію. Будинок бывшой школы бы сьме хотіли зреконштруовати, абы служыв передовшыткым жытелям нашого села.“ (Пкф)