“Поможте к навернутю Руського дому в Пряшові вшыткым Русинам“ так звучить вызва нелем до Русинів, котров вызывають орґанізаторы вызвы – выбор Руського клубу 1923 взяти участь на громадї обчанів на підпору навернутя будовы Руського дому в Пряшові, жебы зась служыв вшыткым Русинам і шырокій общности на културно-сполоченьскы події, про котры была тота будова куплена нашыма предками на основі народной збіркы в 1925 роцї. Як ся далі пише у вызві „громада бы мала підпорити і дотеперішнїй успішный ход судного конаня і трестне ознамлїня з року 2009 односно самозванцїв, котры взяли тоту будову“. Єдночасно давають орґанізаторы вызвы знати, же Міністерство внутра СР схвалило становы Руського клубу 1923, котрый тоту громаду орґанізує і котра ся одбуде, днесь,  3. юна 2019 од 16.00 год., перед будовов Руського дому в Пряшові на ул. Главній 62. Єдночасно в середу 5-го юна мож прийти о 8.45 год. на Окресный суд в Пряшові, де ся знова буде рішыти будова Руського дому. (Пкф)