Чісло хворых на осыпкы в окресі Гуменне за послідніх выше двох тыжднів наріс лем мало, вецей пригод шак евідують в сусіднім Врановскім окресі. Як словацьку пресову аґентуру TASR інформувала говоркыня Уряду верейного здравотницьтва СР Даша Рачкова, к вчерайшому дню евідують в Гуменскім окресі десять пригод даного захворіня. Найвецей хворых (7) є в місті Гуменне, троє суть зо села Збудьске Довге. Меджі нима суть троє дітей до єдного рока жывота, пять дітей є у віковій ґрупі єден аж штирї, решта суть пять- аж девятьрічны. Рачкова спомянула окрім іншого, же в сусіднім Враносвскім окресі евідують од зачатку марца сполу 139 хворых на осыпкы. К 3. маю їх там было 124. В окресі Міхалівці было наголосено од зачатку того року четверо захворінь на осыпкы, актуалні там за єй словами уж несуть. Епідеміолоґове на выходній Словакії за словами говоркыні неперерывно роблять епідеміолоґічны дослідженя і одобрують протиепідеміолоґічны опатріня на заставліня шыріня осыпок в сполупраці із вшыткыма заінтересованыма субєктамі. (TASR, Пкф)