Як інформовав Інформачный центер Пряшівской архієпархії, в середу 14-го децембра 2022-го року посвятив владыка Петро Руснак, апостольскый адміністратор Пряшівской ґрекокатолицькой архієпархії, просторы новой Ґалерії Мікулаша Климчака в Лютині. В рамках події одбыло ся і одкрытя выставы умелецькых творів, котрых автором є малярь Мірослав Бухер. Будованя Ґалерії Мікулаша Климчака реалізовало ся од юла 2021-го до юна 2022-го року. Фінанчно выбудованя підпорив сумов майже 173 тісяч евр і Пряшівскый самосправный край в рамках Вызвы про реґіон 2019. Архітектонічный план новой ґалерії є з ательєру архітекта Петра Марцінка. Ґалерія в Лютині буде презентовати цінности реґіону і посередництвом уменя формовати містну комуніту і навщівників. Ґалерія дістала мено по Мікулашови Климчакови (рр. 1921 – 2016), вызначнім словацькім малярьови, скулпторови, філозофови і іконописцьови, котрый гордо голосив ся ку Ґрекокатолицькій церькви. Родак з Гуменного ціле жытя черьпав у своїх творах з традічной візантійской іконоґрафії, і кедь не робив традічны іконы подля церьковных канонів, але мав свій властный унікатный штіл. Його іконы окрашають інтерьєр Базилікы мінор в Лютині, але і в многых далшых церьквах на теріторії Пряшівского краю. (ЛЕМ.ФМ, Pkf)