В неділю 31-го марца 2019 нагородив владыка Йоан, пряшівскый ґрекокатолицькый архієпіскоп і метрополіта Словакії нагородив шістьдесять девять віруючіх лаіків, котры суть головно із Пряшівской ґрекокатолицькой архієпархії. Інформував о тім Пресцентер Пряшівской архієпархії. По архієрейскій літурґії в Базиліці мінор в Лютині каждому із нагородженых передав метрополіта Памятну медайлу Юбілейного року Пряшівской архієпархії 2018, котрый святковав ся із нагоды аріґованя Пряшівской єпархії, вєдно із декретом, на котрім є мено нагородженого і прічіна нагороджіня. Меджі актуално нагородженыма вірниками суть довгорічны канторы, кураторы, но і віруючі, котры репрезентують Ґрекокатолицьку церьков у співі народных і духовных співанок, в ґоспеловім музиці,  хоровім співі ці вытварнім уменю, далей тоты, котры помагають Пряшівскій архієпархії в медіалній области, орґанізованьом подій, фінанчно, ставебно, технічно, архітектонічно, стараньом ся о ґробы ґрекокатолицькых священиків, а нагородили ся і  люде, котрым ся церьков хотіла подякувати за їх довгорічну службу на Архієпіскопскім уряді в Пряшові. Не забыло ся ани на тых, котры безплатно своїм выступом збогатили Святочный ґалавечур із нагоды Юбілейного  року Пряшівской архієпархії в децембрі 2018-го року. (Лем.фм, Пкф)