Пряшовска універзіта в Пряшові зачінать в найближшых днях с розсяглов реконштрукційов Шпортовой галы з інвестиційов скоро 840.000 евр. Універзіта на реконштрукцію здобыла дотацію із штруктуралных фондів Европской унії, з Операчного проґраму кваліта жывотного середовища. Вышка сполуфінанцованя є у вышкі 5 процентів. Цільом обновы галы є енерґетічне ушпоріня. Реконштрукчны роботы бы ся мали докінчити до 12 місяців. Інформувала о тім говоркыня пряшівськой універзіты Анна Полачкова. В рамках реконштрукції зреалізує ся затепліня обводовых стін галы і єй стріхы, вымінять окна, до котолні ся наішталує нове тепелне черпадло. Модерна технолоґія буде выужыта і про вздухотехніку, кліматізацію і рекуперацію. Шпортова гала была докінчена в 1993 року і служыть нелем потребам высокошколскій педаґоґіцкій едукації, але ся ту одбывать і много вызнамных шпортовых акцій.
(Петро Кімак-Фейко)