Перша змінка о селі Штефуров в окресі Свидник ся датує з року 1414. І кедь село зазнало в своїй гісторії і свої такзваны великы часы, днесь село скоріше приходить до забытя. Абы ся тото насправды нестало, старостка села ся снажыть запоїти до такых проєктів, котры бы селу хоч маленько помогли. Єдным з такых проєктів є і выставба ціклоходника, котрый буде переходити через їх село. Як далі старостка села Штефуров Яна Рішкова повіла, „тым, же наше село є тісно звязане з Бардіёвскым окресом і найближшыма селами, як є Маргань і Ласцов, запоїли сьме ся до проєкту перепоїня даных окресів ціклотрасами, де єдна з них бы мала переходити од Ґіралтовец через споминаны села, далей через Штефуров, Вальківці, Шаришскый Щавник а мала бы продовжувати аж на Бардіёв і Поландію“. Старостка села Штефуров собі од даного проєкту обіцяє вецей навщівників села, котры будуть відіти, же і тот забытый край мать дашто до себе а наконець собі будуть цінити і тоту природу і істым способом то буде добрі і про розвой аґротуристикы в їх селі.