У віторок 28-го юла у віці 89 років навсе опустила дочкы, котры значать світ, бывша членка драматічного колектіву Театру Александра Духновіча в Пряшові Анна Симкова. Народила ся в Меджілабірцях. Ціле своє жытя присвятила акторству. Членков драматічного колектіву іщі втогдышнього УНТ была од 1946-го року. Грала величезне множество ролей різного характеру, ці тіпу як наприклад Анна Каренина (Л. Н. Толстой), Марія Стюартова (Ф. Шіллер), Десдемона (В. Шейкспір) і іншы. Творчім гляданьом в акторьскій інтерпретації хосновала іноватівны поступы емоціоналного експресівного актора. Анна Симкова мала дорогоцінну характерову черту – не знесла робити на половину, не знесла, коли ся за штось мусила червеніти, зато у своїм акторьскім прояві была вірна своїй поетіці, і вдяка тому собі сохранила высокый творчій штандард. Із свойов покоров принимала вшыткы ролі, ці головны або неголовны – як на сцені в театрі, так і в жывоті. Не грала про себе, але про публіку, котра про ню была вшыткым. Похорон буде 31-го юла о 13.00 год. в Домі смутку в Пряшові. Вічная їй память! (ДАД, Pkf)