Підтатраньскый музей в Попрадї зрештавровав далшы візуалны дїла зо своїх збірок. Дякуючі дотації з Фонду на підпору уменя ошетрили три вытварны дїла. Інформовав о тім куратор фонду уменя музея Марек Ружіньскый з тым, же їх заміром є поступне рештаврованя частей збірок, котры суть частёв сталых експозіцій в Попрадї або побочкы в Спішскій Суботї а суть в невыговуючім технічнім ставі. ,Напрямуєме ся тыж на дїла, котры не были дотеперь презентованы а выжадують одборный засяг на то, жебы могли быти наслїдно выставлены про верейность. В рамках того проєкту были ошетрены три образы, котры суть частёв експозіції в Попрадї,“ повів Ружіньскый.  Позераючі на попереднїй став предметів была їх презентація выразно проблематічна. Цїлём проєкту было принавернути їм первісну подобу, заставити так процес деґрадації, тым і дештрукції дїл, єднак і потреба забезпечіти їх адекватну презентацію.

(TASR, Шутіова)