Проєктовыма замірями своїх културных орґанізацій в рамках вызвы міністерства културы в проґрамі Обновме собі свій дом ся на своїм посліднім засіданю занимали пряшівськы крайскы посланці. Цілково одобрили предложіня жадостей трьох орґанізацій на даня фінанчного вкладу і сполуфінанцованя про штирі проєкты. Пресаґентуру TASR о тім інформувала Леа Геілова з одділіня комунікації і пропаґації Уряду Пряшівського самосправного края (ПСК). Посланці одобрили предложіня жадости на реконштрукцію і модернізацію господарьскых будов Крайской ґалерії в Пряшові з предпокладаным келчіком скоро 644.000 евр, фінанцованя обновы інтерєру першого і другого штоку Великого барокового каштеля в Ганушівцях над Топльов і єдну зо штирьох турнь на третім штоку з предпокладаным келчіком скоро 705.000 евр і єдночасно Крайске музеум в Пряшові буде жадати о фінанчны средства міністерство културы при заміры комплексной обновы Ракоціго палаца і міщаньскых домів ч. 90 і 98 в Пряшові. Посланці одобрили і жадость Музеа в Кежмарку, котре планує зреконштруовати міщаньскый дом в центрі міста, на  котрім хоче вымінити окна і стріху, зреалізувати рештавраторскы роботы і обновити фасаду. Одгадованый келчік є у вышці скоро 182.000 евр. (TASR, Pkf)