Посланці Пряшівського самосправного края (ПСК) днесь стрітли ся на своїм посліднім засіданю в тім волебнім періоді. У своїм проґрамі мали напланованых 35 пунктів. Посланці заоберали ся наприклад управов розрахунку і реґіоналнов стратеґіов выховы і  едукації на середніх школах ПСК в школскім року 2023/2024,  їднали о пропозиції проґраму господарьского і соціалного розвоя ПСК на рокы 2021-2030, котрый є  условійом про здобытя джерел зо штатного розрахунку і додатковых джерел про розвойовы проєкты. Одобрювали участь края в проєкті черезгранічной сполупраці з Польщов зо сполуфінанцованям, але і вытворіня елокованого робочого місця пряшівской Языковой школы в Крачуновцях.  Посланці їднали і о келчіку на сполуфінанцованя жадостей о датацію на тот рік в компетенції Міністерства праці, соціалных справ і родины СР про 11 інштітуцій соціалных служеб ПСК. Предметом днешнього заступітельства было і одобріня пропозиції операчного плану зимной удыржбы  драг ПСК. (TASR, Pkf)