18- го мая 2019-го року проходило 7-ме засіданя Світовой рады Русинів, выконного орґану Світового конґресу Русинів в меджіконґресовім періоді. Членове рады стрітили ся в Старій Любовні. Представителі членьскых держав конґресу заподівали ся приготовлінями на XV. Світовый конґрес Русинів і ІХ. Світовый форум русиньской молодежи, котры тот рік будуть проходити в Любовняньскых купелях в днях 4-го аж 7-го юла. Но світова рада рішыла і актуалны проблемы. Світова рада Русинів почас засіданя обговорила і новый україньскый Закон о функціонованю україньского языка як державного языка, котрый 25-го апріля 2019-го року схвалила Верьховна рада Україны і такой потім го підписав втодышній презідент Петро Порошенко. Як ся пише в записі зо засіданя рады, закон „діскрімінує остатні языкы народностных меншын, котры не будуть  годны свою народность розвивати“. Участны засіданя ся згодли на тім, же напишуть односно того закона протестне писмо. Мало бы быти загнане на Раду Европы і депутатови Народной рады СР і єдночасно членови загранічного выбору в парламенті Любошови Благови. (П.Медвідь)