12-ый юн є Світовым конґресом Русинів (СКР) од 2009-го року схваленый як День Русинів Словакії. Уж традічно з нагоды того дня Русиньска оброда на Словеньску, членська орґанізація СКР, орґанізує централны святкованя. Тот рік, 9-го юна, першый раз святковало ся в Гуменнім. Якраз в тім місті, котре тот рік має і тітул Місто културы 2024, обыли ся централны святкованя Дня Русинів Словакії. Русиньска оброда на Словенську як головный орґанізатор могла тото русиньске торжество зреалізовати і вдяка підпорі Міста Гуменне, Вігорлатьского музея в Гуменнім і Церьковній ґімназії святого Йоана Златоустого. Проґрам зачав в каштелю в котрім  были курто посередництвом музичных выступлінь одпрезентованы окремы русиньскы реґіоны. Своїх представителів мали окресы Пряшів, Стара Любовня, Бардейов, Свідник, Снина, Меджілабірці, а самособов і Гуменне. По презентації реґіонів святочно, з русиньскыма флаґами, флаґом Словацькой републікы і Европской унії, наслідовав кройовый поход центром міста – по пішій зоні, і Русины выпараджены в кроях різных реґіонів, при співі народных співанок, заінтересовали вшыткых, котры в тім часі были в місті. Поход закінчив ся перед будовов Містьского културного центра, в салі котрого пак вже продовжали святкованя ґалапроґрамом. В нім  брало участь коло 200 выступаючіх із споминых окресів. Жрідло фотоґрафії: Facebook/ ЛЕМ.ФМ (ЛЕМ.ФМ, Пкф)