Коалічны партії Za ľudí і Sme rodina не підпорять одкликаня Іґора Матовіча з OĽaNO з посады міністра фінанцій. Выходить то з высловів віцепремєркы і лідеркы Za ľudí Веронікы Ремішовой і міністра роботы і підпредседы Sme rodina Мілана Крайніака на пресконференції. Міморядне засіданя парламенту ку одкликованю Матовіча має зачати в середу. Крайніак конштатовав, же одкликаня члена влады не підпорять, бо суть в коаліції. Підкреслив, же парламент бы мав занимати ся головно законами на поміч людям. Партія Za ľudí подля Ремішовой ниґда не підпорить одкликаня члена коаліції. Крітіковала SaS, же при збераню підписів на одкликаня споїла ся з партійов Hlas-SD.

(Медвідь, TASR)