Рух Sme rodina пропонує, жебы піняжны довгы, котры выникли недорослій дітині, перенесли ся на його законного заступника. Досягнути то хоче новелов Обчаньского законника, котру депутаты передложыли на їднаня актуалного засіданя парламенту. Лідер руху Борис Коллар апеловав у понедільок на председів коалічных партій, жебы новелу підпорили. „Покля выникне піняжный довг недорослій дітині, котра не досягла вік 15 років, переходить тот довг од його вынику на його законного заступника. Значіть на родічів, в припаді, же має встановленых выхователів, та на выхователів. Є там выняток. Покля довг выникнув карным чіном, кедьже одповідность за карны чіны ся на Словакії може дотуляти 15-річных, в такім припаді тот довг зіставать на дітині, і кедь має лем 15 років,“ пояснив депутат Мілан Крайніак. Новела бы подля Коллара не выжадовала жадны фінанчны средства, лем бы ся хоронили діти, жебы ся не дістали до екзекуцій.

(Медвідь, TASR)