Опозічный рух Sme rodina апелує на премєра Петра Пеллеґрініго і членів влады, жебы ясно выразили ся односно Ґлобалного пакту Орґанізації зъєдиненых народів о міґрації, не підписали го і ґарантовали, же Словакія ани тов формов не прийме жадных міґрантів і не нарушыть властну сувереніту. На понедільковій пресконференції то повів лідер руху Борис Коллар з тым, же так важный документ мусить рішыти ся в парламенті. „І днесь бісідуєме о тім самім як в році 2015. Но уж то не є через обовязковы квоты, 190 біженців в повнім чіслі, а є то небезпечна незнама в подобі ґлобалного пакту о міґрації ОЗН. Бісідує ся о правно незавязнім документі, котрым мають державы декларовати сполочный поступ при рішіню меджінародной міґрації. Його підписом прямо не потверджуєме кілько міґрантів приймеме, но одкрывають ся похыбности, же державы не будуть веце вырішовати о тім, хто є і хто не є леґітімный міґрант,“ повів Коллар. Лідер руху є пересвідченый, же Словакія наперед мусить вырішыти свої сироты і статісячі людей, котры суть огрожены бідов. На приятю пакту ся договорило 193 членьскых держав ОЗН в септембрі 2016-го року. Цільом документу є помочі ліпше орґанізовати міґрачны токы і укріпити права міґрантів.
(TASR, Медвідь)