Днесь собі припоминаме 49-ту річніцю од зачатку інвазії войск Варшавского договору до втогдышньой Чехословакії. Інвазія і наслідня окупація Чехословакії совітьсков армадов, котра тырвала аж до року 1991, была насилным чіном проти сувереніты державы і заставила демократізачный процес із 1968-го року знамый під назвов Празька ярь. Річніцю окупації днесь рано припомянула собі і підпреседничка влады Словацькой републікы і міністерка справедливости Луція Жітняньска вєдно із депутатами Народной рады Франтішком Шебейом і Петром Кресаком коло памятной табліці єдной із жертв окупації Петра Леґнера. При памятній табліці жертв перед Універзітов Коменьского в Братіславі днесь дополідне пєтну споминку зробила і Конфедерація політічных арештантів Словакії. Премєр Роберт Фіцо днесь оддав честь Александрови Дубчекови положіньом квітя на його гробі.
(Петро Медвідь)