Першым директором нововыникнутого Фонду на підпору културы народностных меншын на основі конкурзу ся стане Норберт Молнар. Міністер културы СР Марек Мадяріч го до функції выменує 31-го юла – інформовав о тім резорт културы. Першыма задачами нового директора буде рішіня центра фонду, добудованя вшыткых його орґанів подля закона о Фонді і выписаня вступной вызвы. Норберт Moлнар робив в медіах, быв редактором, заступцьом шефредактора і шефредактором денника Új Szó. Конкурз, до котрого ся приголосили Владимір Марушін, Норберт Молнар і Марта Ріхтерова, проходив формов верейного выслуханя. Кандідаты в часовім ліміті 20 минут представили свої проєкты розвитку Фонду. В другій части презентації одповідали на сім ідентічных опросів од 7-членной фаховой комісії заміряных на способности і фаховы зналости. Фонд нагороджать дотеперішню сістему, котров меншынову културу дотовав Уряд влады СР. Тота задача теперь переходить на міністерство културы СР. Першу вызву Фонд опублікує до кінця того рока.
(Анна Кузмякова)