Выступліня презідента ку завлечіню вєтнамского подникателя было веце заміряне на політічны цілі, повів ґенералный прокуратор Ярослав Чіжнар з тым, же на основі того выголошіня хотів зрушыти плановану стрічу з презідентом, председом парламенту і премєром. Стріча наконець в понедільок одбыла ся. „Цільом того, же єм пожадав трьох найвысшых діятелів, жебы сьме ся стрітили, было забороніня ескалації сітуації в повязаню з інформаціями, котры были публікованы в пятніцю. По тім, што єм собі посмотрив выступліня пана премєра і пана презідента, думав єм, же то зрушу, бо ся мі якбач не подарило то, што єм хотів досягнути, жебы сьме рішыли діла раціонално,“ повів Чіжнар. Ґенералный прокуратор підкреслив, же собі выпрошує ображіня о тім, же прокуратура нич не робить. Чіжнар подля своїх слов ґарантовав презідентови, же ся буде поступати в припаді одвлечіня Вєтнамця обєктівно і інформовав о поступах, котры уж суть напланованы. Як повів, контактовав і колеґів з Чеськой републікы і Німецька, котры му приобіцяли інформації.
(Медвідь, TASR)
Фото: TASR