Презідентка СР Зузана Чапутова сі в Ню Йорку довєдна зо своїм чеськым колеґом Петром Павлом припомянула 30 років самостатности СР і ЧР а тыж 30 років членства обидвох країн в Орґанізації Споєных народів. Чапутова то у четверь увела в приспівку на соціалній сїтї, інформує TASR. ,,Історія першой Чехословацькой републікы є узко повязана з Америков. Праві ту мать свої корїня формованя нашых демократічных традіцій. Доказом, є  і Bohemian National Hall, в котрій сьме ся стрїтили а котра є вызначным центром чеськой і словацькой културы в Ню Йорку уж веце як сто років,“ написала презідентка. Додала, же хоць ся путь Словакії і Чехії в єднім штатї скончіла перед высше 30 роками, „не ославлёвали сьме розход, але приятельства і споєнецтво. Єм барз рада, же тот юбілей сьме довєдна могли ославити як два суверенны, демократічны і меджінародно решпектованы штаты,“ закончіла.

(TASR, Шутіова)