В рамках консолідації бы ся дали фінанції здобыти і так, же бы дакотры державны свята не были єдночасно днями робочого покоя. В понедільок то выголосив председа влады Роберт Фіцо по засіданю презідії його партії Smer-SD. Премєр повів, же покля іде о кількость державных свят, маєме єдну з найвекшых в рамках Европской унії. „Покля бы сьме ся доїднали, же державне свято зістане, но не буде єдночасно дньом робочого покоя, то так само путь, як здобыти далшы фінанції,“ повів премєр з тым, же в рамках консолідації є „на столі“ веце варіант поступу. Фіцо знова підкреслив, же консолідація бы ся не мала дотулити соціалного штандарду, котрый вже быв досягненый. Ушпорити подля нього буде треба 1,5 аж 2,6 міліарды евр.

(Медвідь, TASR)