Словацька влада має інтерес продовжовати в подобных меджівладных конзултаціях з Українов, україньску владу зато позывать на стрічу, котра бы ся одбыла початком слідючого рока в Братіславі. По скінчіню сполочного засіданя з Українов коло Ужгорода то вчера повів премєр Роберт Фіцо. Премєр так само голосить ся ку каждому плану, котрый має ґарантовати мір на Україні. По вчерашнім засіданю міністры внутрічніх справ, школства і земледільства словацькой і україньской влады підписали сполочны меморандумы. Підписав ся і меморандум о взаємнім порозуміню Україны і Словакії, котрый передбачать підпору україньскых учітелів і штудентів на Словакії. Пише ся в нім о прямій співпраці меджі освітніма інштітуціями в іновачній діятельности. Міністры земледільства підписали меморандум о співпраці. Так само підписав ся договор, котрый має імплементовати договор о реадмісії. Словацькый премєр на стрічі коло Ужгорода так само повів, же Словакія безусловно підтримує вступ Україны до Еврской унії. Словакія має за словами премєра інтерес брати участь на обнові Україны по войні, головно што до пригранічных реґіонів із Словакійов.

(Медвідь, TASR)