Як сьме вже скоріше інформовали, словацька влада в децембрі публіковала План леґіслатівных задач влады СР на рік 2024, в котрім є на місяць юн напланована Пропозіція закона о Фонді на підпору културы, котрой ґестором має быти Міністерство културы. Приятьом такого закона бы ся зрушыли два існуючі фонды – Фонд на підпору уменя і Фонд на підпору културы народностных меншын, а зробив бы ся єден новый – Фонд на підпору културы. Свою незгоду із зрушіньом меншынового фонду выразив і новый уповномоченый влады Словацькой републікы про народностны меншыны Акош Горонь. Інформацію односно свойой позіції ку рушіню окремого меншынового фонду 4-го януара дав на офіціалный сайт уповномоченого на соціалній сіті. 3-го януара, звернув ся Ґорогь і писмом до міністеркы културы, пані Шімковічовой, в котрім выразив страхы з реорґанізації дотеперішніх верейноправных фондів, і пожадав о преформулованя задачі в леґіслатівнім плані влады в згоді з Проґрамовым выголошіньом влады. Єдночасно Ґоронь  пожадав і о стрічу, на котрій бы собі з міністерков пояснили свої становиска. Уповномоченый Горонь так само спомянув, же буде апеловати, жебы уж міністерством зряджена робоча ґрупа, в котрій суть участны і представителі народностных меншын, была залучена до приправы новелізації. (ЛЕМ.ФМ, Пкф)