Як інформував сайт Уряду уповномоченого влады Словацькой републикы про народностны меншыны, уповномоченый Ласло Буковскый і централна директорка Словацькой обходной іншпекції Надежда Махутова підписали меморандум о співпраці. Цільом підписаного меморандуму є актівно співпрацовати при мерькованю над дотримованьом закона о хоснованю языків народностных меншын в области охороны спотребителя. В языках народностных меншын є потрібне публіковати інформації, котры дотуляють ся огрожіня жывота, здоровя, безпечности або маєтку. За остатні місяці, як ся пише у пресовій справі, меджі Словацьков обходнов іншпекційов і Урядом уповномоченого про народностны меншыны вытворила ся добра співпраця і встановили ся округы обовязків, на котры є звертана увага подникательскых субєктів. Завершіньом того процесу є підпис меморандума з 24-го юна 2019-го року. Сіґнатары ся підписом завязали, же уповномоченый буде іншпекції давати фахову і методічну поміч в області хоснованя языків народностных меншын і іншпекція зробить моніторінґ в області охороны, заміряный на потверджіня або вывернутя такых підозрінь у субєктів, котру суть під їй дозорнов юрідікційов. Моніторінґ буде робити ся в рамках звычайной контролной діятельности. (Петро Медвідь)