Реґіонална політіка на Словакії не є добра а способлює звекшованя реґіоналных роздїлів меджі выходом і западом. Реґіоналну політіку треба достати до розумной подобы, жебы ся наперек інвестованым міліардам роздїлы не звекшовали. По четверёвій стрїчі представітелїв Унії міст Словакії (УМС) зо словацькыма посланкынями Европского парламенту то повів презідент УМС Ріхард Рібнічек. Посланкыня ЕП Міріам Лексман (KDH) собі думать, же є важніше посунути рїшіня о еврофондaх до реґіонів, затоже там ся будуть інвестовати ефектівно. ,,Кедь хочеме средства з еврофондів не лем міняти, але і ефектівно інвестовати до міст, сел і реґіонів, треба докончіти децентралізацію. Люде в реґіонах знають омного лїпше, што потребують а до чого інвестовати, як урядници в Братїславі. Децентралізація принесе економічный розвиток, затоже набалить далшы економічны актівіты а посуне реґіоны допереду,“ припомянула Лексман з тым, же за 20 років хоснованя еврофондів ся роздїл меджі найбогатшым і найбіднішым реґіоном на Словакії стройнасобив.

(TASR, Шутіова)