Україна про пошырёваня нового коронавірусу запре граніцї про чуджінцїв до конця септембра. Тоты превентівны крокы будуть платны од 29. авґуста до 28. септембра. На своїй вебовій сторінцї то рекомендує Міністерство загранічных дїл і европскых належностей СР. Обмеджіня вступу на теріторію Україны ся не буде односити на чуджінцїв і особы без штатной належности многых катеґорій. Належать меджі них заместнанцї загранічных заступітельскых урядів, конзуларных урядів і заступлїнь меджінародных орґанізацій акредітованых на Українї, як і родинны прислушницї. Обмеджіня ся не дотулять шоферів накладного транспорту, пілотів, членів посадкы летадла або іншых членів летецького персоналу, посадкы лодного накладного транспорту, рушнёводїчів, возмайстрів, влаковых чат ани обслужных робітників в желїзнїчнім накладнім транспортї.

(TASR, Шутіова)