Компетенції і аґенду дотеперішнього Выбору про народностны меншыны і етнічны ґрупы, котрый належав під Раду влады Словацькой републікы про людьскы права, народностны меншыны і родову рівность, возьме під себе по новому Рада влады Словацькой републікы про народностны меншыны. Выходить то із штатуту рады, якый управлює їй задачі і компетенції як окремого фахового орґану влады. Штатут рады схвалила словацька влада на своїм засіданю в середу 30-го октобра 2024-го року. Нова народсностна рада буде прямо порадным орґаном словацькой влады. Подля штатуту буде повнити функцію конзултатівного орґану при забезпечованю участи членів народностных меншын, буде діяти як постоянный фаховый орґан про область імплементації Европской харты реґіоналных або меншыновых языків. Так само має рада брати участи на коордінації публічных політік, концепцій і стратеґій державы в области прав народностных меншын. Рада в рамках свого складу має председу рады, підпредседу рады, палату народностных меншын, представителів рады за централны орґаны державной справы і постоянных членів рады без права голосовати. Председом народностной рады є председа влады Словацькой републікы. Посада підпредседы є про уповномоченого влады СР про народностны меншыны. В повязаню з тым змінив ся і штатут уповномоченого. (ЛЕМ.ФМ, Пкф)