Скорочіня волебного періоду подля Вінцента Буйняка з Катедры конштітучного права Універзіты Коменьского в Братіславі не може быти предметом референдума. Конштітуція Словацькой републікы говорить, же предметом референдума не можуть быти основны права і слободы, дані, одводы і державный розрахунок. Веце пояснінь того подля Буйняка говорить, же выконованя мандату депутата Народной рады Словацькой републікы належыть меджі його основне право. Референдумовый вопрос ся так подля правника може дістати на Конштітучный суд. Опозічна партія Hlas-SD, котра зберать підписы за референдум, вірить, же на вызбераня буде старчіти пару місяців.

(Медвідь, TASR)