Скоро 80 середнїх одборных школ здобуде веце як 50 міліонів евр на модернізацію матеріално-технічного выбавлїня працовиск, інтернатів, на реконштрукцію просторів ці підвышіня енерґетічной господарности будов. Як увела на прессконференцію підпредседничка влады СР і шефка Міністерства подогосподарства і розоя сел Ґабрєла Матечна, резорт подогосподарства выгоднотив жадости з Інтеґрованого реґіоналного операчного проґраму заміряны на підвышіня кількости штудентів на практічнім навчаню. „Ід днешнёму дню підпориме 77 одборных школ, котры здобудуть веце як 50 міліонів евр на технічне выбавлїня. Тоты школы суть розмістнены по цїлій теріторії Словакії. Гроши підуть на матеріално-технічне выбавлїня працовиск, на реконштрукцію просторів, на підвышіня енерґетічной господарности будов. Тота сума не є фінална, оцїнюєме уже друге і третє коло. Далша алокація буде в обємі далшых скоро 50 міліонів евр. Довєдна має цїла вызва обєм 100 міліонів евр,“ увела Матечна. „До першого кола было довєдна передложеных 107 проєктів в сумі 68,8 міліона евр. Одобреных было дотеперь 77 проєктів в сумі 50,24 міліона евр,“ уточнив ґенералный директор секції проґрамів реґіоналного розвоя резорту подогосподарства Марек Мітошінка. Інформацію принесла Тлачова аґентура Словацькой републикы.

TASR