„Нова верзія школьского закона, котра діє од 1-го януара 2025-го року, може огрозити існованя русиньского школства, значіть двох школ із навчалным языком русиньскым,“ пише Мілан Ян Піліп, член Рады влады Словацькой републікы про народностны меншыны і член презідії Округлого стола Русинів Словакії. Писмом в тім ділі звернув ся днесь 13-го януара 2025-го року до уповномоченого влады Словацькой републікы про народностны меншыны Акоша Гороня. Школы, котры днесь Русины на Словакії мають із навчалным языком русиньскым, суть в Кленовій і Калній Розтоці. Далшы школы, де днесь учіть ся русиньскый язык, не суть із навчалным языком, але з навчаньом русиньского языка. Джерело фотоґрафії: Фацебоок/ ЛЕМ.ФМ (ЛЕМ.ФМ., Пкф)