Давкы в гмотній нудзі ся будуть в будучім року звышовати о скоро 5 %, правдеподобно од 1. юла. Інформував о тім на бріфінґу по засідані Господарской і соціалной рады Словацькой републикы шеф Міністерства праці, соціалных діл і родины Словацькой републикы Ян Ріхтер. “В общім о 5 % звышуєме вклады, давкы в гмотній нудзі, што было акцептоване і партнерами. Што хочу підкреслити, і при даній пропозиції закона – од 2009 року небыла тота частка валорізована ані змінена. Тоту, котру найбівше посильнюєме, не о 5 %, але із 66,20 евр на 132,40 евр, є вклад про заместнаного члена домашньости із звязком із актівачным вкладом. То значить, же як ся заместнать голова родины, найчастіше то є муж, чоловік і родич є надалей під уровньов і поберать гмотну нудзу, так актівачный вклад небуде 66,20 евр, як дотепер, але 132,40 евр. Тым кроком маме максімалный інтерес мотивувати людей, абы робили“, підкреслив то міністер праці.
(Петро Кімак-Фейко)