Презідент Андрей Кіска прияв в понедільок абдікацію міністра културы Марека Мадяріча, котрый одышов із функції з причины забитя новинаря Яна Куцяка і його приятелькы. Кіска оцінив приступ Мадяріча і повів, же бы собі з нього могли брати приклад і далшы. Пополідне куртый бріфінґ зробив і председа влады Роберт Фіцо. Повів, же на Словакії проходить проба о дестабілізацію ку чому давать за його думками влад і презідент републікы. Непрямо вказав на то, же за презідентовым медільным проявом може быти америцькый міліардарь Джордж Шорош і акцентовав, же презідент ся з ним стрітив в септембрі 2017-го року. О стрічі зо Шорошом притім інформовав сам презідент іщі в тім часі і пояснив, же з філантропом і бізнісменом бісідовали о вопросах ромской комуніты на Словакії. Фіцо мав одказ і про політічных партнерів: „Політічны вопросы будеме рішыти в короткім часі. Хочу то одказати і політічным партнерам, же сьме приготовлены на такы розговоры. Но нашым першорядым цільом є, вытваряти таку атмосферу, жебы поліцайны силы могли тот бруталный злочін розслідити.“ Джордж Шорош меджічасом выдав выголошіня, в котрім дементує, же бы мав дашто із сітуаційов на Словакії. Ку немішаню заграніча до внутрішньополітічной сітуації уж вызвав і міністер загранічных діл Мірослав Лайчак.
(TASR, Mедвідь)