Презідент Словацькой републікы Петер Пеллеґріні в понедільок выменовав Павла Ґашпара за директора Словацькой інформачной службы (SIS). Директора мєнує презідент на основі пропозіції влады. Ґашпарову номінацію на тоту посаду схвалила влада у фебруарі. Бывша голова державы Зузана Чапутова лишыла менованя нового директора тайной службы на свого наслідника. Павол Ґашпар быв дотеперь намістником директора SIS. По зміні штатуту тайной службы здобыв компетенції їй директора. В минулости быв на посаді державного секретаря Міністерства справедливости. Выменованя Ґашпара крітікує опозіція. Подля руху Progresívne Slovensko тым голова державы доказує, же є лоялным презідентом владной коаліції. Проґресівці крітіковали і недостаток професійных скушеностей у Ґашпара на тоту посаду, неясны річі коло його маєтку ці похыбный способ установліня до функції дочасно повіреного намістника SIS владов. KDH од початку поважує номінацію Ґашпара за шефа SIS за похыбну, і рух не є згодный з його выменованьом. Подля SaS выменованя Ґашпара доказує, же презідент служыть Робертови Фіцови, а не гражданам Словакії.

(Медвідь, TASR)