Презідентка СР Зузана Чапутова в понедільок стрітила ся з підпредседом словацькой влады Робертом Калиняком. Інформовав єй о здравотнім стані премєра Роберта Фіца. Бісідовали так само о планованій стрічі лідерів політічных партій і о актуалній безпечностній сітуації на Словакії. Презідентка о тім інформовала на соціалній сіті. Што до планованой стрічі політічных лідерів Чапутова написала, же розуміє, же сітуація собі выжадує веце часу і терпеливости, но важнішым як сама стріча є ціль, а тым є успокоїня сполочности, о котре ся подля презіденткы мусиме далше намагати різныма способами. Стрічу лідерів партій запропоновала презідентка вєдно з новозволеным презідентом Петром Пеллеґріні, но коалічны партії Smer-SD і SNS о таку стрічу не проявили інтерес.

(Медвідь, TASR)