В суботу проходили на Словакії выборы до Высшых теріторіалных цілків. На выборах брало участь 29,95 процента воличів, што є історічно найвекша участь од заснованя жуп у 2001 році. У выборах опозічны правіцьовы партії выграли над владнов партіой SMER-SD. Покля соціалісты мали дотеперь 6-ох жупанів, по суботі їм зістали лем двоми. Так само SMER-SD стратив на кількости депутатів в окремых крайскых парламентах. Новыма жупанами по суботі суть Юрай Дроба в Братіславі, Йозеф Віскупіч в Тырнаві, в Тренчіні зіставать кандідат соціалістів Ярослав Башка, в Нітрі так само обгаїв мандат Мілан Беліца з партії SMER-SD, новов жіліньсков жупанков і історічно першов женов у функції шефа краю ся стала Еріка Юрінова, в Баньскій Быстріці выграв незалежный кандідат Ян Лунтер, в Пряшові дотеперь 16 років служачого жупана Петра Худіка вычерять Мілан Маєрьскый, і в Кошыцях ся новым жупаном став Растіслав Тырнка. Дебакел зазначіла екстремістічна партія Кotleba – Ľudová strana naše Slovensko. Котлеба не обгаїв мандат жупана в Баньскій Быстріці і жаден з їх кандідатів не став ся жупаном ани в іншім краю. Із стовок їх кандідатів на депутатів ся до крайскых парламентів дістали лем двоми – Маріян Котлеба в Баньскій Быстріці і Мілан Угрік в Нітрі. Успішны у выборах на функцію депутата были головно незалежны кандідаты.
(Петро Медвідь)