По зрушіню Народной кріміналной аґентуры взникнуть три новы шпеціалізованы поліцайны утвары. Напрямены будуть на корупцію, дроґовы трестны чіны і терорізм. Міністер внутрїшнїх дїл Матуш Шутай Ешток (Hlas-SD) то у четверь повів в телевізії TA3. О пресній подобі реорґанізації Поліцайного збору буде подля міністра в найблизшых днях інформовати поліцайный презідент Любомір Солак. ,,Од першого октобра дойде ку першій фазі реорґанізації, о котрій єм говорив уж мінімално пів рока. Была спрацована поліцайным презідіом на основі штатістік і на основі того, жебы бой з орґанізованым злочіном, але і зо штандарднов фінанчов кріміналітов, корупціёв, терорізмом і бой проти дроґовій чінности быв што найефектівнїшый,“ пояснив Шутай Ешток. Поліцайне презідіум про TASR увело, же цїлём реорґанізації є ефектівне розложіня сил і средств.

(TASR, Шутіова)