Перше коло волеб презідента Словацькой републікы одбуде ся в суботу 23-го марца. Припадне друге коло, покля в першім не здобуде ани єден кандідат надполовічну векшыну голосів, одбуде ся в суботу 6-го апріля. Термін волеб оголосив в понедільок председа Народной рады Петер Пеллеґріні, котрый в тот самый день оголосив і свою кандідатуру на презідента. Функчный період презіденткы Зузаны Чапутовой кінчіть 15-го юна, знова кандідовати не буде. Кандідаты мусять вызберати будь 15 тісяч підписів гражданів, жебы могли кандідовати, або мати 15 підписів посланців парламенту. Термін на створіня волебных округів і волебных містностей Пеллеґірні становив до 30-го януара, термін на створіня окресных о окружных волебных комісій до 19-го фебруара. Перше засіданя комісій має быти до 29-го фебруара. Кандідовати буде і бывшый міністер загранічных діл а довгорічный словацькый діпломат Іван Корчок, кандідатуру оголосив і далшый реномованый словацькый діпломат Ян Кубіш, котрый вызбераня 15 тісяч підписів оголосив лем пару днів тому.

(Медвідь, TASR)