Председа парламенту і партії Hlas-SD Петер Пеллеґріні хоче в припаді свого успіху в презідентьскых вольбах зробити вшытко про тото, жебы была владна коаліція і далше стабілнов. Як додав, усвідомлює собі одповідность за сповніня волебных приобіцянь партії Hlas-SD. Повів то в реакції на актуалну сітуацію. Подля презідентьского кандідата Словакія потребує презідента про людей, не чісто коаліції або опозіції. Голова державы подля нього не має быти противагов ани служніцьов конкретной влады. Підкреслив так само потребу покоя. В понедільок офіціално оголосив свою кандідатуру і председа далшой коалічной партії SNS – Андрей Данко, котрый на пресконференції остро атаковав свого коалічного партнера Петра Пеллеґріні а вецераз акцентовав, же за його думаньом найліпшым презідентом бы быв председа третьой коалічной партії Smer-SD Роберт Фіцо, а так само обвиньовав шефа партії Hlas-SD з можливой зрады коаліції. Фіцо свою кандідатуру вылучів, і його партія підтримує кандідатуру Петра Пеллеґріні.

(Медвідь, TASR)