Подля председу влады СР Петра Пеллеґрініго Словакія не хоче у вопросї міґрації приходити лем з неґатівным поглядом проти квотам, але хоче понукнути і пропозіції, як інакше приспіти к рїшіню той темы. Увів то в часї взаємной прессконференції з председом Европской комісії (ЕК) Жаном-Клодом Юнкером (Jean-Claud Juncker), яка ся одбыла у четверь в Бруселї. „Словакія не буде заступовати лем обычну позіцію – же не хочеме повинны квоты, што є іншак немінна позіція влады Словацькой републикы, але будеме бісїдовати і о тім, як собі представлюєме інакше приспіти – іншов формов солідаріты і іншыма настроями помочї рішыти тот вопрос. В тім будеме все барз конштруктівны і сполягливы. Є досправды на словацькій владї, жебы розгодла, што бы Словакія могла зробити лїпшым способом як дотеперь. Думам собі, же діскузії, котры сьме абсолвовали у звязї з тым, были барз хосенны, были плодны а теперь є уж на Словакії, жебы розгодла, покы іде о тоты настрої солідаріты, котры бы могла понукнути Европскій унії.‟ Пропозіції заты премєр не конкретізовав, бо подля нёго мусять быти выслїдком діскузій з партнерами в рамках ЕУ і дома. Додав, же є пересвідченый о тім, же Европска комісія вєдно із Словакіов до кінця юна найде способ, як тым найлїпшым можным способом выядрити солідаріту Словакії.
(TASR, Цітрякова)