Опозічны субєкты SaS, OĽaNO i Sme rodina суть згодны в тім, же кандідаты на судців Конштітучного суду бы ся мали в парламенті выберати конштітучнов векшынов. Їх представителі то повіли по понедільковій стрічі з презідентом Словацькой републікы Андрейом Кіском. Но окрім того мають різны пропозіції і условії. Лібералы пропонують способ выбераня такый, корый бы подля них забезпечів і участь опозіції. „Дало бы ся то робити методов, же каждый депутат бы мав лем єден голос. Кедь выбераме трьох судців і каждый має лем єден голос, опозіція ся знає договорити і холем єдного із тых трьох собі выбрати свого. Так бы то могло довгодобо фунґовати і в іншых выборах функціонарів,“ повів председа SaS Ріхард Сулик. Подля своїх слов то Сулик пропоновав і міністрови справедливости Ґаборови Ґалови із партії Most-Híd. Зміна Конштітуції Словацькой републікы і з ньов повязаны новы правила выберу кандідатів на судців Конштітучного суду суть в другім чітаню. На зміну Конштітуції буде коаліція потребовати і голосы опозіції.
(TASR, Медвідь)