В понедільок 6-го марца 2023-го року в братіславскім владнім готелі Bôrik одбыло ся 48-ме засіданя Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность. Ішло о перше тогорічне засіданя выбору. На проґрамі было девять пунктів, котрыма представителі меншын мали занимати ся. Меджі іншым і рихтованьом оцінкы о стані народностно школства, културы і языка за період років 2021 і 2022. На проґрамі понеділького засіданя мала быти наприклад і тема о роботі Фонду на підпору културы народностных меншын за 2022-ый рік. Членове народносто выбору дістали перед засіданьом матеріал, котрый приготовила директорка фонду Алена Котванова, но пункт наконець переніс ся на далше засіданя. На засіданю проїднала ся і Справа о народностнім высыланю за 2022-ый рік. Тоту передкладав Директор народностного высыланя RTVS (Радія і телевізії Словакії) Аттіла Ловас. Представителька Міністерства загранічных діл Словацькой републікы і европскых справ СР Барбара Ілкова одпрезентовала на засіданю Справу о проходжіню і резултатах пятого кола моніторованя імплементації Рамкового договору на охрану народностных меншын в Словацькій републіці. Такый моніторінґ, котрый ся робить періодічно, становлює, в котрых областях має Словакія зліпшыти права народностных меншын. (ЛЕМ.ФМ, Pkf)