5-го септембра 2018-го року в вратіславскім владнім готелі Bôrik проходило 30-те засіданя Выбору про народностны меншыны і етнічны ґрупы. Засіданя одбыло ся в згоді із новым Штатутом і порядком їднаня выбору, подля котрого має меншыновый орґан дві коморы. На участных засіданя чекало десять пунктів проґраму. Меджі найважнішы пункты належала інформація о приготовльованю методікы перепису населіня у 2021-ім році, ці інформація о приготовльованім учебнику, котрый бы мав росшырити знаня школярів о народностных меншынах на Словакії. Выбор тыж говорив о діялности Фонду на підпору културы народностных меншын. Як про наше радіо Русин.фм повів Петро Медвідь, член выбору за русиньску народностну меншыну „Фунґовавьом того фонду быв выбор барз неспокійный, кедьже ку дня 5. септембра коли было засіданя выбору, было выплачено барз мало процентів проєктів, котры были схвалены іші в марці 2018 року. Наприклад русиньска народностна меншына мала з понад даякых 130 проєктів покы підписаных лем 33 проєктів, што є о дашто вецей як 20 процентів“.
(Кімак-Фейко)