У соботняйшых комуналных вольбах были найуспішнішы незалежны кандідаты на старостів і пріматорів, котрых выбрали в 1232 селах і містах, што представує 42,42 процентів. Офіціалны выслідкы комуналных волеб одобрила Штатна комісія про вольбы і контролю фінанцованя політичных партій. Волебна участь была 48,67 процентів. За незалежныма кандідатами наслідувала партія Смер-СД, котрой кандідаты успіли в 592 містах і селах, што є 20,38 процентів. Третя є Словеньска народна партія з прибытком 160 старостів і пріматорів, четверте КДГ із 157 і пятый Мост-Гід, котрый обсадив 127 місць пріматорів і старостів. В представницьтвах міст і сел буде найвецей посланців незалежных, а то 7301, што є 35,36 процентів. Наслідують посланці за Смер-СД, із 3692, што є 17,88 процентів, потім наслідує КДГ із 2350 посланцямі, што предстваує 11,38 процентів, потім Словацька народна партія із 1678 посланцамі, СМК із 1248 і Мост-Гід, котрый здобыв коло 1000 посланецькых місць. Найвецей воличів пришло к урнам в селі Хорвати, обвод Кошыці – околиця, волило там 89,88 процентів воличів. Найнижша участь, лем 19,44 процентів была на кошыцькім Лунику ІХ.
(ТАSR)
Фото: TASR