В септембрі того рока зачав штат з реалізаціойов другого народного проєкту, котрый є заміряный на понижуваня безробіття в найменше розвинутых окресах. За словами ґенералного директора Централы праці, соціалных справ і родины СР Маріяна Валентовіча є на його бютжет приділеных 50 міліонів евр. Як далі повів, проєкт буде мати три актівіты, „Першов є актівіта вытвараня робочіх місць у заместнавателів, де маме приправену суму скоро 25 міліонів евр. Такым способом хочеме підпорити в найменше розвинытых окресох вытворіня 2300 робочіх місць про кандідатів о роботу. Дальшых 9,5 міліонів евр є приправеных про вецей як 1000 людей про робочі місця в самосправі. А то нелем робочі місця по селах ці містах, але і у фірмах, котры діють під самосправами. Третьов актівітов народного проєкту є план подпоры скоро 2050 кандідатів о роботу, котры собі в найменше розвинутім реґіоні вытворять жывность. Там є призначена сума вецей як 11 міліонів евр. В данім припаді про каждого з них є призначеный вклад у высшкі 5600 евр.“
(TASR)