Міністерство здравотництва і Міністерство фінанцій ся договорили на дофінанцованю здравотництва в сумі 90 міліонів евр. Обсягом договору є і підпис меморандума меджі здравотницкыма субєктами, інформовала аґентура TASR. Меморандум підпишуть вшыткы три здравотны поістьовні, Асоціація шпыталів Словакії, Асоціація державных шпыталів, додавателі амбулантной старостливости, Асоціація лабораторій і далшы субєкты з области здравотництва. „На основі меморандума увольниме до кінця того року договореных 90 міліонів евр на дофінанцованя здравотництва. Єм радый, же по тыжднях їднань тота тема заперла ся. На підписі меморандума єм тырвав, бо не хочу, жебы тема здравотництва знеужывала ся перед вольбами, повів міністер фінанцій Ладіслав Каменіцькый. Подля резорту фінанцій є договорена сума резултатом їднань і суть в ній взяты до увагы вшыткы реалны пожадавкы і єдночасно можности розрахунку верейной справы.

(Медвідь, TASR)