Конець окремого Пряшівского і Тренчаньского краю, майже о половину менше окресів. А выникнутя сполочных сельскых урядів. З тым рахує пропозіція о новім теріторіалнім діліню Словакії, ку котрому дістали ся словацькы медії. Документ выникав на Міністерстві внутрішніх справ Словацькой републікы, но офіціално резортом затля не быв представленый. Міністерство, як пише словацькый денник Postoj, чекало і на резултаты списованя з 2021-го року, котры при творіню новой мапы взяло до увагы. Пропозіція нового теріторіалного діліня не є дефінітівна і од марца того року єй припомінкують орґанізації міст і сел як Здружіня міст і сел Словакії ці Унія міст Словакії, котры видять найвекшы проблемы в припаді фінанцованя і новых компетенцій. Покля бы ся прияла реформа в такій подобі, як є в документах Міністерства внутрішніх справ, Словакія бы вже мала лем пять країв – Братіславскый край, Западословацькый край, Северословацькый, Середньословацькый і Выходословацькый край. Нове діліня рахує і з тым, же бы было менше окресів. Із 79 днешніх окресів бы подля пропозіції зістало лем 46. З матеріалів, котры ся дістали до медій, мож наприклад видіти, же покля бы така реформа перешла, окрес Меджілабірці бы ся злучів з окресом Гуменне, так само окрес Свідник з окресом Стропків.  (TASR, Pkf)