Новым председом Судной рады Словацькой републікы став бывшый председа Конштітучного суду Ян Мазак. Судна рада го зволила в понедільок на своїм засіданю. За його зволіня голосовало 13 із 16 участных членів. Мазак у функції вычеряв Ленку Праженкову, котра з позіції одступила. Пропоновали го номінанты із вшыткых зложок властей, значіть членове судной рады волены судцями, парламентом і выменованы владов а презідентков. Амбіційов Мазака є зістати у функції цілый період. На засіданю Судной рады декларовав, же покля буде зволеный за председу, не буде кандідовати на посаду судцю на Суднім дворі Европской унії. Про кандідатуру вырішыв головно жебы навернути довіру людей в суды.

(Медвідь, TASR)