„Мерзить ня, же єм міг когось скламати,“ оправдав ся презідент Анрей Кіска в діскузнім проґрамі O 5 minút 12 на марґо кавзы із неодведжіньом правилной дані його фірмы KTAG, котра собі зараховала міджі вытраты і фінанції на його кампань. Як презідент повів, од його вступу до політікы были на нього кладжены высокы очекованя і зато мав быти досліднішый коло приготовліня змлувы з фірмов, як і коло учтованя. Днесь, як повів в проґрамі верейноправной телевізії, бы поступав іншак. Єдночасно підкреслив, же іде о орґанізовану брудну гру, котра хоснує даны хоронены державов. Кіска є пересвідченый, же перешкаджать, бо вказує на знеужываня державной моци і зато ся зачала ціла кавза. Презідент почас розговору з модератором проґраму Мартіном Стрижінцьом не поменовав прямого винника выникнутой сітуації.
(Петро Медвідь)