На Словакії в понедільок 3-го мая року зачало асістоване списованя жытелів. Тото списованя буде до 13-го юна. Ку зачатку асістованого списованя дав выголошіня уповномоченый влады Словацькой републікы про народностны меншыны Ласло Буковскый. Уповномоченый у выголошіню повів, же з дотеперішніх резултатів видиме, же про актівістів приходить досправдова робота, но його повинностьов є звернути увагу старостів і пріматорів на то, жебы были максімално напомічны головно про сеніорів. В тій віковій катеґорії бывать подля Буковского заступліня членів народностных меншын векше як є словацьке середнє чісло, зато є про окремы народности, як і про успіх списованя і точны даны потрібне, жебы селами і містами становлены асістенты мали максімалну довіру містных жытелів і тоты їм признали свою народность. „Лем слободно признаны даны прозрадять о нашій країні найвеце детайлів і розкрыють їй богату културну розмаїтость,“ закінчів выголошіня уповномоченый.

(Медвідь, TASR)