Кандідатів на судцю Европского суду про людьскы права буде Судна рада Словацькой републікы волити 18-го септембра. О функцію мають інтерес Ондрей Лаціак, Радослав Прохазка і Даніела Єжова, інформовала Канцеларія Судной рады СР на своїм вебсайті. Ондрея Лаціака номіновала Словацька адвокатьска комора і Нотарьска комора СР. Радослава Прохазку так само номіновала Словацька адвокатьска комора і Здружіня судців Словакії. Обидвоми вже кандідовали в минулости. Новов кандідатков є Даніела Єжова, котру номіновала предсидателька Судной рады СР Марцела Косова. Єжова робить адвокатку і має скушености із рішіньом меджінародных правных вопросів і вопросів Европской унії.

(Медвідь, TASR)